My Broosheid

Julle is my spieel, my verhoog gordyn

keer dat ek terug trek

soos die eb gety

Julle is my soet en my suur asyn

Julle is my alleen en my samesyn

Julle is my asem en my bloed

Julle is my broosheid en my moed

Julle is my lewe en my dood

Julle is my begeerte en my nood

Julle is die spil van my bestaan

Julle is die plek waarheen ek gaan

Ek is julle wortels en julle huis

Waar ons saam is, is ek tuis
image

© 2016, Annalize. All rights reserved.

Deel met jou vriende!
Share

Myne

image

In die oggend breek ek jou tentjie af
En kry leidrade van eet en lag
Ek rol slaapmatte op
stamp my kop
En onthou die vreugde van die dag

In die middag slaan ek jou klavier toe
En sien weer jou half geslote oë
Ek vryf oor die hout
Donker en oud
En hoor weer die klanke van jou droom

In die aand streel ek jou tenger rug
En sien weer jou helder giggel lag
Ek soen jou gul mond
Pienk en rond
En voel jou taai handjies op my gesig

Nou in die weerkaatsing van die maan
Lê ek knus teen jou bekende bors
Ek hou jou lyf vas
Waarteen ek pas
En my hart weet hierdie is my rus

© 2016, Annalize. All rights reserved.

Deel met jou vriende!
Share

Sonskade

Wanneer die son jou verbrand in plaas van verwarm is dit tyd om in die skadu te gaan sit.

Wanneer die skadu jou koud maak in plaas van koelte gee, is dit tyd om ñ trui te gaan haal.

Dit wat op die oog af goed vir jou lyk kan baie keer skadelik wees.
Daar was al baie sulke situasies in my lewe.

Die son lyk aanloklik, maar ervaring het al te veel keer geleer dat dit jou kan verbrand. Die brandskade herstel grotendeels, maar nie heeltemal nie. Daar is ñ lewenslange effek.

Hoe vermy mens dit?

Jy kan vir kort rukkies die son opsoek sonder om te verbrand. Jy kan sonskerm aansmeer vir kunsmatige beskerming. Of jy kan die skadu soek.
Die keuse is tog sekerlik myne?

© 2016, Annalize. All rights reserved.

Deel met jou vriende!
Share

Voelgoed Blog: Skottelgoed… ‘n laaste uitweg vir ‘n kleuter tantrum

Vandag het my vierjarige skottelgoed gewas. Nie omdat ek haar verantwoordelikheid wou leer of omdat sy gevra het nie. Bloot omdat sy verskriklik, onmoontlik stout was.

Sy het met almal baklei en skoor gesoek. In ñ redelike vrugtelose poging om haar tot haar sinne te skok, het ek haar op die toilet sitplek laat sit om te dink oor haar sondes. Ek was ordentlik en het die deur oopgehou sodat sy nie verwerp voel nie. Sy het opgestaan, die deur toegegooi én die sleutel gedraai.

Ek het haar later hoor sing en weereens ordentlik aan die deur geklop om te hoor of sy gereed is om terug te keer na die samelewing. Sy het ingestem (moes eerder haar parool offisier gekontak het, maar hy het weggekruip in die ander badkamer), die deur oopgesluit en op die vloer gaan lê. Haar bene was moeg en lam en kon nie werk nie. Nadat ek twee keer tot by drie getel het, haar probeer regop bring het, haar probeer plant het, het ek soos ‘n goeie, moderne ma ingegee.  Ek het haar gedra tot in die kombuis.

Haar aanvanklike woede was oor die muffin resep waarmee Anli besig was. Sy wou dit lees. Sy kan al ’n woord lees (haar naam), en glo nou dat sy die geskrewe taal heeltemal onder die knie het.

Toe sy weer die resepteboek sien, gooi sy hom teen die muur. ‘Ek haaaaaaaaaat die boek!’ En onmiddelik is ons weer waar ons was.

Nou kyk mens het baie geduld êrens op ’n rëendag, maar myne was weg. (Seker omdat dit nie ’n reëndag was nie) Ek het haar opgetel en gaan neerplak voor die wasbak.  “Vir jou straf, moet jy skottelgoed was!” (Ja, my idees was op)

Die trane het oombliklik opgedroog.  Haar stywe ruggraat het verslap. Die drama was verby.

“Hoe doen mens dit?” vra sy met ‘n senuweeagtige giggel

Toe besef ek.  Hierdie is ‘n oomblik. ‘n Grote. Nou moet ek nog ’n bekentenis doen. Hierdie jongste dogter van my het my heeltemal in die sak. Ek het soos botter gesmelt op ‘n warm dag.

“Met ‘n lappie, my Liefie”, koer ek terwyl ek uit die hoek van my oog ‘n tiener sien wat haar oë rol.

© 2016, Annalize. All rights reserved.

Deel met jou vriende!
Share

Woord

image

My kop is vol interne dialoog
Dit warrel van intonasie
Ongespreekte insinuasie
Noanses en rym

In my kop woed ‘n eensaam dialoog
Dit maal met woorde
Taal akkoorde
Wrewel en pyn

In hierdie binnewêreld hel
Verdwyn die self
In ‘n swart gat
van soek en delf

In hierdie donker tronk
Word die antwoord ontdek
En uitgehaal
agter grendel en hek

© 2016, Annalize. All rights reserved.

Deel met jou vriende!
Share

Ag Moeder

Ek kruip in die braaikamer weg. Dis tienuur in die aand en dis koud hier, maar dis verfrissend stil.

Dis Moedersdag vandag en ek is op hierdie oomblik besig om ñ reusagtige stuk sjokoladekoek te eet.

Mý eie moedersdag bederf.

Moedersdag was effens bleek die jaar. Q het trippel ‘longontsteking’ en lê die laaste twee dae in die bed, op die bed of naby die bed.

Ek was vyfuur vanoggend op met ons jongste en het vroeg honger geword. Ek het skelm ontbyt geëet voor my tradisionele verwagte moedersdag ontbyt..

Nege uur het ons tiener die slaap uit haar oë gevee en tien minute later het ek roereier op toast gekry.

Vyf minute later het ek opgestaan om roereier op toast vir die ander vier lede van my gesin te maak.

Gelukkig het ek hulle gister mall toe gevat om vir my ñ geskenk te koop. Mooi oorbelle en ñ kosbare hand gemaakte kaartjie met woorde wat my moederhart laat smelt het.

Moedersdag was hierdie jaar ñ gewone dag. Dit is immers die doodgewone wat my soos ñ moeder laat voel.

Laat ek terugkeer kamer toe voor die sieke my kom soek.  Siek mans. Dis nou ñ topic vir ñ volgende post.

© 2016, Annalize. All rights reserved.

Deel met jou vriende!
Share

Die bekentenis van ‘n (net-net) goed genoeg Ma.

img_7759Vandag het ek ‘n halfuur te laat by die skool opgedaag om na my kind se boeke te kyk. Die storie van my lewe.  Ek is altyd te laat, te gejaagd, te vergeetagtig, te deurmekaar, te álles wat te doen het met ongeorganiseerd wees.

Ek het redelik onlangs ‘n verklaring vir dit gekry wat ek met liefde as ‘n verskoning gebruik.  Ek het ‘n ‘Motiveerder’ funksionering styl.  Goed om planne te maak.  Swak om dit uit te voer.  Passievol en deurmekaar.

In elk geval, so dwarrel ek die klas binne op die laaste nippertjie en oorrompel die Juffrou heeltemal met my onsamehangende gebrabbel oor Afrikaanse punte, ADHD (sy het verseker vandag agtergekom waar my kind die toestand geërf het), late bloomers, middelkind-sindroom en die res kan ek nie onthou nie..

Ek vra haar of alles wel is op die dissipline front en sy vertel my dat my dogtertjie soms te veel in die klas praat.

Hierdie wonderlike juffrou vertel hoe sy Hettie Britz se boom profiele gebruik om die kinders in haar klas te hanteer. Terwyl my brein oortyd werk om te onthou watse boom my middelkind is, wonder ek verdwaas waar en hoe ek gefaal het?  Ek het lankal moed opgegee met die sielkundige benadering van kinders grootmaak. Dit het ‘n kopskoot gekry in my enkelouer dae waar oorlewing my grootste motiveerder was.

Ek is so deurmekaar dat my oudste dogter van dertien, haar wekker tien minute voor myne stel om seker te maak ek staan betyds op om hulle almal wakker te maak.

Ek het twee weke terug my oudste twee kinders vergil wat baklei het oor ‘n KORRELTJIE pienk rice krispies en in die proses die hele bak omgegooi het. As hulle pa hulle nie gered het nie sou ek hulle gedwing het om dit van die vloer af te eet.

Ja, ek lees tans ‘n boek genaamd ‘The Confessions of a Bad Mother’.

‘The Middle’ is my gunsteling TV program, want dit laat my effens normaal voel.  Ek voer my kinders gereeld bokspap in die aand as hulle kla oor die groente op hulle borde..

Ek het Sondag in die kerk met ‘n vrou gepraat wat ‘n klein, pienk, vyf maande oue babatjie het.  Haar oë blink terwyl sy praat oor min slaap, haar kind wat skree as sy vir haar skoene aantrek en hoe moeilik dit is om kerk toe te gaan met die pragtige dingetjie.  Sy maak my skoon tranerig terwyl sy praat oor haar babatjie se perfeksie, slaap roetines en die vreugde van Ma wees.

Oppad huis toe dink ek, my jongste se slaap roetine is om voor die TV aan die slaap te raak terwyl ek haar rug kielie en hierdie nuwe Mamma sal my nooit glo as ek vir haar vertel dat sy eendag heel moontlik met ‘n histeriese ondertoon in haar stem ‘SHARRAAAAAAP!’ vir die pienk dingetjie sal wil skree nie. Of dat sy haarself in die badkamer sal wil toesluit, want sy het die behoefte om ‘n glas pienk melk oor haar vierjarige se kop uit te gooi nadat sy ‘n tantrum gooi omdat jy gewaag het om  eerste die melk, en toe die poeier in te gooi. DIT MOET GLO ANDERSOM WEES.

Ja, Ma wees.

Niemand berei jou voor op die reis nie.  Daar is geen boek vir dit nie, want selfs die mees gefokusde, agtermekaarste, georganiseerde Ma doen dit soms verkeerd.

Ons skree soms wanneer ons moet sag praat en ons ignoreer goed wat ons moet straf.

Ons gee vir gluten intolerante kinders pizza met ‘n koring basis en vir hiperaktiewes MSG en rooi koeldrank.

Ons drink soms twee glase wyn vir die behoud van die vrede en om ons oorblywende sinne te preserveer.

Ons het soms net nie krag om te wonder oor die effek van ons woorde en aksies op ons bloedjies nie. Ons probeer ons uiterste bes in die sirkus waarin ons ons bevind.

Ons het ook ‘n stowwerige boek, ‘Seven habbits of a highly effective family’, van Stephen Covey op ons boekrak. Daar is ñ vergeelde boekmerk in tussen bladdy sewentig en een en sewentig.

Vir ons is daar comfort in die chaos.  Vir my in elk geval.  Daar is mos ‘n sê ding ‘Happy wife, Happy life’  Dieselfde kan seker gesê word van die Ma?

Gooi weg die boeke en leef elke dag soos dit kom.  (Ek is nie ñ kenner nie, so jy doen die op eie risiko)

Bid hardop vir jou kinders en laat hulle hoor wanneer jy vir die Here dankie sê dat hy jou geseën het met super spesiale, pragtige kinders. Laat hulle ook hoor as jy jammer sê vir dit wat jy verkeerd gedoen het.

Druk jou kinders styf teen jou vas, sê meer ja as nee.  Laat hulle bak en brou en verf en plak en plak hulle skepsels teen die yskas en kamermure. Sê vir hulle jy is lief vir hulle.

Lag vir die chaos, laat hulle foute maak, leer hulle naasteliefde deur self jou naaste lief te hê.  Sê en wys vir hulle dat hulle goed genoeg is.  Maak ‘n fuss van hulle  uniekheid.

Gebruik bergamot essence vir al die hare wat jy uit jou kop getrek het.

Straf hulle wanneer hulle verkeerd is, gil as die situasie dit vereis. Sê opreg jammer vir die kere wanneer jy wel onnodig baklei het.  Budget vir goeie koffie en goeie wyn.

Kry ‘n sleutel vir jou kamerdeur.   Leer hulle van PMS en dat jy soms soos ‘n leeu voel wat skapies vir brekfis wil opvreet. Onthou ook om te beklemtoon dat hulle dan ékstra soet moet wees.

Leer hulle dat jy nie perfek is nie sodat hulle nie eendag perfeksie van die lewe verwag nie.

Wys vir hulle jou hartseer.

Ons doen nie ons kinders ‘n guns deur hulle die heeltyd te beskerm teen die moeilike goed nie.  Ons kan hulle nie vir altyd beskerm nie.  Rus hulle toe vir hulle sirkus eendag.

Jy is goed genoeg.  Foute en al.  Goed genoeg.  So skink ‘n glas van daardie goeie wyn en ontspan.

 

 

 

© 2016, Annalize. All rights reserved.

Deel met jou vriende!
Share